Igeldo Herria

• Blog!
• Kategoria: Azaleko Nabarmendua

Blog!

Hurrengo kategoria duten postak ikusten: Azaleko Nabarmendua

Gazteekin eta Ludotekarekin berritasunak datoz

Nork argitaratua: Igeldo Herria Kategoriak: Azaleko Nabarmendua 4 hilabete, aste 1 atzera

Igeldoko Tokiko Entitate Txikiaren sorrera gerturatu ahala, Batzordeak indartuz eta martxa hartuz doaz. Batzorde Soziokulturala, esaterako, gazteekin eta Ludotekarekin dabil lanean orain.
Gazteei dagokienean, Itsas Aurre erabiltzeko aukera eman zaie eta erabilera hori behar bezala zehazteko prozesu bat eraman dute aurrera Hezten aisialdi taldeak gidatuta. Bost saio egin dituzte denera eta azkenekoa abenduaren 13an izan zen. Bertan gazteak eta Batzordeko kideak elkartu ziren berriz. Gazteen planteamendua jaso eta funtzionamendurako oinarriak adostu zituzten. Dagoeneko, kultur etxeko espazioa erabiltzen hasi dira. Gazteek, ostiral arratsaldetik igandera izango dute Itsas Aurre erabiltzeko lehentasuna (betiere, ekintza jakin, festa edo an­tzeko zerbait ez badago). «Hala ere, lehentasuna izateak ez du esan nahi gainerako eragileek edo herritarrek momenturen batean sartzerik izango ez dutenik, eta hori jakinarazi zaie», adierazi dute ba­tzordeko kideek.
Batzordekideak pozik daude prozesuak emandako emaitzarekin eta gazteek izan duten jarrerarekin/egin duten lanarekin. Aukera honekin, azken urtetan izandako hutsune bati nolabaiteko erantzuna emango zaiola ere azpimarratu dute.

Sortu da Igeldoko Tokiko Entitatea

Nork argitaratua: Igeldo Herria Kategoriak: Azaleko Nabarmendua 4 hilabete, aste 1 atzera

Igeldoko Tokiko Entitate Txikia (TET) abenduaren 19an sortu zen ofizialki. Donostiako Udalak egin beharreko zuzenketak eginda, Foru Aldundiaren esku utzi zuen espedientea berriz urriaren 25ean eta abenduaren 17an eman zioten onarpena.
Behin sortuta, hurrengo pausoak izango dira Foru Aldundiak Kudeaketa Batzordea (gestora) izendatzea, alderdiek Udal hauteskundeetan Igeldon lortutako emaitzen arabera (EH Bilduk 4; EAJk 1), eta gestorak lehenengo auzo batzarra egitea (Plenoa) TET martxan jartzeko. TET Batzordeko kideek jakinarazi dute beraiek prest azaldu direla orain arteko lanari jarraipena eman eta gestora hori osatzeko. Hala adierazi diete alderdiei.
Igeldoko Udalak 1.499.973 euroko aurrekontua izango du 2025 urtean.

Egin beharrekoak
Azken pausoen eta datozenen berri emateko, Herri Batzarra egin zen urriaren 20an.
TET sortzen denean, hurrengo pausoak edo egin beharrekoak honakoak direla adierazi zuten TET Batzordeko kideek:
- Egitura administratibo-juridikoa eraikitzen jarraitu (momentu honetan Donostiako Udaleko teknikari bat dago guztia martxan jartzen Igeldok teknikari propioa izan arte).
- Gure eskumenak gure gain har­tzeko bideak aztertu (brigada, kontratuak...).
- Herri antolaketa mantendu eta hobetu (Batzordeak indartu).
- Langile propioak aukeratu.
- Igeldoko Udalaren egoitza berriaren proiektua landu (Eskola Zaharra).
- Donostiako Udalarekin izango ditugun harremanak zehaztu (Jarraipen Batzordea martxan jarri, hitzarmenak lotu...).
- Eskumen berriak lortzeko negoziaketan jarraitu (hirigintza, etxebizitza, hilerria...).

Pala Txapelketa aurrera doa inoizko parte hartze handienarekin

Nork argitaratua: Igeldo Herria Kategoriak: Azaleko Nabarmendua 4 hilabete, aste 1 atzera

Neguko Pala Txapelketako 6. edizioa jokatzen ari da. Azaroaren 15ean hasi zen txapelketa eta inoizko parte hartze handiena izaten ari dela azaldu dute antolatzaileek. Denera 55 bikote ari dira parte hartzen. Mutilak lehenengo mailan 9 bikote, mutilak bigarren mailan 28 bikote eta neskak 18 bikote. Igeldokoak 8 bikote dira.
Final laurdenak eta finalerdiak otsaila erdi-martxo hasieran jokatuko dira eta finalak, berriz, martxo erdialdera.
Partiduak asteburuetan joka­tzen dituzte. Ostiraletan, arratsaldeko 18:30etatik aurrera 3 partidu izaten dira eta larunbatetan, goizeko 9:00etan hasita beste lau partidu.
Urtero bezala, antolatzaileek dei egiten diete herritarrei frontoira gerturatzeko partiduak ikustera, «giro bikaina izaten da eta!».

IKE: Lehenengo proiektua: fotovoltaikoak

Nork argitaratua: Igeldo Herria Kategoriak: Azaleko Nabarmendua 4 hilabete, aste 1 atzera

Energia berriztagarria oinarri izanik, Igeldoko enegia soberania ahalik eta handiena izateko asmoz sortu da IKE. 76 bazkide dira gaur egun eta lehenengo proiektua martxan jarri dute. Eguzki plakak jarriko dituzte hainbat bazkideren teilatuetan. Etorkizunean, proiektu gehiago etorriko dira.

Jubilatuak gustora daude ekintzen dinamikotasunarekin

Nork argitaratua: Igeldo Herria Kategoriak: Azaleko Nabarmendua 4 hilabete, aste 1 atzera

Jubilatu Elkartetik adierazi dutenez, urteko egutegia egiteko garaian, kontutan gehien hartzen duten alderdia aktibitateen barietatea da «gure bazkide eta jubilatuen beharrei hobeto erantzutea baita gure helburua». Jubilatuen parte hartzea zabalagoa izateko, aktibitate berriak eta desberdinak aurki­tzen saiatzen direla gaineratu dute. Hori horrela, ikasturte berriaren errepasoa eginda, gustora daude ekintzen dinamikotasunarekin.
Alde batetik, hasieratik martxan dauden ikastaroak dauzkate: Pila­tes, mantentze gimnasia eta memoria lantzeko ikastaroa. Ikastaro hauek nahiko finkatuta dauzkate.
Bestetik, aurten hasitako ikastaro berriak dauzkate: Musikoterapia ikastaroa (aurreko ikasturte bukaeran probatu zen eta irailarekin jarraipena eman zaio) eta Autozaintza eta automasaje ikastaroa. Proba bezala, hiruhileko honetan eskaini da. Ikastaro honetan, masajea ikasteaz gain, nork bere buruaren autozainketa nola egin behar duen irakasten dute. Hamabost pertsonek parte hartzen dute eta datorren urteari begira, aurrera jarraitu edo ez aztertu behar dute.

• 4. orrialdea 79-(e)tik
• ←
• 1
• 2
• 3
• 4
• 5
• 6
• 7
• 8
• 9
• 10
• →