Igeldo Herria

• Blog!
• Kategoria: Azaleko Nabarmendua

Blog!

Hurrengo kategoria duten postak ikusten: Azaleko Nabarmendua

Meteorologikora eta Añorgara bisita egin dute jubilatuek

Nork argitaratua: Igeldo Herria Kategoriak: Azaleko Nabarmendua urte 1, 4 hilabete atzera

Jubilatuek bi bisita egin dituzte azaroan eta horien berri eman dute.
«Askotan urrutira joaten gara, inguruko altxorrak ezagutu gabe. Azaroaren 15ean, Jubilatuen Elkar­tetik 25 pertsona joan gara Igeldoko Meteorologi Behatokia ikustera. Hau 1905. urtetik, Europako museo aktiboetako bat da, eguraldia eta itsasoaren gorabehera guztiak gordetzen baititu sistematikoki. Egunero, egunez eta gauez, haizea, hozberoa, hezetasuna, presio atmosferiko eta abar neurtzeko dauzkaten tresnen datuak jasotzen dituzte. Nahiz eta gaur egun tresna elektronikoak jarri dituzten, lehengo merkuriozko termometroen erregistroak direla fidagarrienak dio Margarita Martin AEMET Euskadiko zuzendariak. Abenduak 13an, asteazkena, Marga­rita Martinekin berriro gelditu gara. Oraingoan, Behatokiaren historia ezagutzeko hitzaldia emango digu. Margaritak adierazten duen jakinduria benetan interesgarria da».
Bestalde, Añorgako Rezola Museoa eta Eliza ikustera joan ziren. «25 pertsona joan gara azaroaren 8an. Museo hau Luis Peña Ganchegi arkitektoaren zuzendaritzapean 2000. urtean eraiki zuten, Rezola fabrika sortu zenetik 150. urtemuga ospatzeko. Añorgan, 1917an eraikitako Karmengo amaren parrokia ere ikusi genuen. Nahiz eliza berria izan, bertan artelan interesgarriak daude, Julio Beobideren bi eskultura eta gaur egungo margolan handi batzuk paretetan. Jarraituko dugu inguruak miatzen», adierazi dute.

Txangoak, bertsoak eta ospakizunak, hiruhilekoa bukatzeko

Nork argitaratua: Igeldo Herria Kategoriak: Azaleko Nabarmendua urte 1, 4 hilabete atzera

Eskolako lehenengo hiruhilekoa bu­ka­tzear da. Hiruhileko honetako proiektuaren izena honakoa da: Nor bizi da hemen? Eta izaki bizidunekin erlazionatutako lanak egiten ari dira.
Proiektuarekin lotutako txangoak ere egin dituzte. Gela guztiak Kristina Eneara joan dira tailer desberdinak egitera. Horrez gain, 2. ziklokoak musika emanaldi bat entzutera joan ziren Atotxara.
Beste irteera bat ere egingo dute 3. zikloko ikasleek abenduaren 12an. Bertso emanaldia ikustera joango dira Lugaritzera eta gai jartzaile lana egingo dute.

Miel Ero, Maritxu Saroi eta Don Martzelino Txisturen istorio beldurgarriak...

Nork argitaratua: Igeldo Herria Kategoriak: Azaleko Nabarmendua urte 1, 4 hilabete atzera

Agerian da, Gau Beltza indarra hartzen ari dela inguruko bazterretan. Aurten, Igeldon inoiz baino haur, gazte, guraso, heldu... gehiago elkartu ginen plazaren inguruetan. Programa oparoaz gozatzeko aukera izan genuen, urteko arratsalde eta iluntze beldurgarrienean. Hala esan eta hala izan zelakoan gaude, ilunabarreko 20:00ak inguruan garrasi galantak entzun baitziren herri inguruko txokoetan.
Arratsaldeko 16.30tarako hasi ziren plaza apainketa eta aurpegi margoketak. Ondoren, eskolako aretoan ipuin kontalariaren ahotik entzun ahal izan ziren istorio misteriotsuak.
Ondoren, hildakoen kalejirak beldurrarazi zituen inguruak. Denak mozorrotuta eta kandelak eskuan egin genuen plaza inguruan bira, aurrean musikatutako autoa genuela.
Gero etorri ziren beldurkeria handienak…..txikienek altxorraren bila zirraragarria izan zuten eta handienek… TXAN, TXAN TXAN… Miel Ero, Maritxu Saroi eta Don Martzelino Txisturen Istorio beldurgarri antzeztuez gozatu zuten. Bueno… gozatu edo… JA, JA JA!!! Istorioak plazan izan zuen hasiera. Ondoren, basora, zelaira, herriko karrika estuetara zabaldu zen. Susto eta garrasi izugarriak izan ziren. Bada haurrik gauean amets gaiztoak izan zituenik… ez da ez harritzekoa!!!
Azkenik, gaua borobiltzeko, hanburgesa ederrak DENONTZAT!!

Giro polita, beste behin

Nork argitaratua: Igeldo Herria Kategoriak: Azaleko Nabarmendua urte 1, 4 hilabete atzera

Urriaren 20, 21 eta 22an Udazken Festa ospatu zen eta beste behin ere giro polita izan zen nagusi. Hodei Magoaren ikuskizunarekin gozatuz hasi zen ospakizuna. Txundituta geratu ziren gerturatutakoak emanaldiarekin. Larunbatean gaztainak hartu zuen protagonismoa. Lehenik, 35 bat ume eta helduk ibilalditxoa egin eta gaztainak bildu zituzten. Ondoren, gaztain erreak jateko aukera izan zen plazan. Igandea izan zen egun nagusia. Azoka egon zen goizean, 23 posturekin. Denetik erosteko aukera izan zen! Tartean, Oliba Jaitsiera egin zen eta Ekain Martikorenaren oliba izan zen azkarrena; Jon Urangarena, berriz, mantsoena. Jubilatuak omentzeko bazkariak ez zuen hutsik egin eta 156 heldu eta 9 ume elkartu ziren mahaiaren bueltan. Eguna eta festa borobiltzeko, talo mundialak jateko aukera izan zen!

Udaran hainbat sari lortuta, pozik daude Ondazarten

Nork argitaratua: Igeldo Herria Kategoriak: Azaleko Nabarmendua urte 1, 6 hilabete atzera

Ondazarte baserrikoek uda oparoa izan dute. Uztailaren hasieran Araitz Otamendi behien prestatzaile eskola batera joan zen Asturiasko Colunga herrira. Bertan aste betez ikasten aritu ostean, azken eguneko lehiaketan, bere kategorian bigarren postuan geratu zen. Abuztuan berriro joan ziren Asturias aldera, LLanera herriko frisoi arrazako txapelketan parte hartzera etxeko bi behi hartuta. Matti izeneko behiak hirugarren postua lortu zuen bere adineko atalean. Harribeltz behia izan zen poz handienak ekarri zizkiena, izan ere, lehen umezko behi honek bere atalean lehen postua eta erraperik onenaren saria lortzeaz gain, behi gazteen finaleko txapeldun geratu zen.

• 16. orrialdea 79-(e)tik
• ←
• 11
• 12
• 13
• 14
• 15
• 16
• 17
• 18
• 19
• 20
• →