Igeldo Herria

• Blog!

Blog!

Ordazkariak izendatu eta batzarra egitea falta da TET martxan jartzeko

Nork argitaratua: Igeldo Herria Kategoriak: Azaleko Nabarmendua 3 hilabete atzera

Abenduaren 20an sortu zen Igeldoko Toki Entitate Txikia. Dena dela, funtzionatzen hasteko, hainbat pauso ematea falta da oraindik. Ordezkariak izendatu behar dituzte alderdi politikoek (EH Bilduk 4 eta EAJ/PNVk 1) eta ondoren lehenengo auzo batzarra egingo da. Izendapenak jasotzean, Foru Aldundiak jarriko du lehenengo batzar hori egiteko eguna. Orri Informatibo hau idazterakoan, oraindik ez zegoen data zehaztuta. Berri gehiago izatean, ohiko bideetatik jakinaraziko da.

Larunbatean hainbat ekintza izango dira Inauteriak ospatzeko

Nork argitaratua: Igeldo Herria Kategoriak: Azaleko Nabarmendua 3 hilabete atzera

Martxoaren 1ean, larunbatean, Inauteriak ospatuko dira Igeldon. Horretarako, hainbat ekintza antolatu dira. Arratsaldean zehar izango dira ekintzak, 17:00etan hasita, plazan.
Lehenengo, maskarak egiteko aukera egongo da eta aldi berean, jolasak ere egongo dira: ping pong, dardoak eta toka, hain zuzen. Etxean ping pong-erako sarea edo palak edukiz gero, ekar­tzeko eskaera luzatu dute.
Antolatzaileek azaldu dute, bi kasu hauetan, 6 urtetik beherako umeek heldu baten laguntza beharko dutela.
Ondoren, 18:00etan, desfilea egingo da. Taldean edo banaka parte hartzeko aukera izango da nahi den musika eskatuz.
Ondoren, luntxa eskainiko da ume eta helduentzako Itsas Aurreko aterpean. Eta 19:00etatik aurrera, karaokea eta dantza egiteko aukera egongo da Goaze­nekin, Itsas Aurre barruan. 19:00-21:00 bitartean, barra irekita egongo da.

Gazteekin eta Ludotekarekin berritasunak datoz

Nork argitaratua: Igeldo Herria Kategoriak: Azaleko Nabarmendua 5 hilabete, 3 aste atzera

Igeldoko Tokiko Entitate Txikiaren sorrera gerturatu ahala, Batzordeak indartuz eta martxa hartuz doaz. Batzorde Soziokulturala, esaterako, gazteekin eta Ludotekarekin dabil lanean orain.
Gazteei dagokienean, Itsas Aurre erabiltzeko aukera eman zaie eta erabilera hori behar bezala zehazteko prozesu bat eraman dute aurrera Hezten aisialdi taldeak gidatuta. Bost saio egin dituzte denera eta azkenekoa abenduaren 13an izan zen. Bertan gazteak eta Batzordeko kideak elkartu ziren berriz. Gazteen planteamendua jaso eta funtzionamendurako oinarriak adostu zituzten. Dagoeneko, kultur etxeko espazioa erabiltzen hasi dira. Gazteek, ostiral arratsaldetik igandera izango dute Itsas Aurre erabiltzeko lehentasuna (betiere, ekintza jakin, festa edo an­tzeko zerbait ez badago). «Hala ere, lehentasuna izateak ez du esan nahi gainerako eragileek edo herritarrek momenturen batean sartzerik izango ez dutenik, eta hori jakinarazi zaie», adierazi dute ba­tzordeko kideek.
Batzordekideak pozik daude prozesuak emandako emaitzarekin eta gazteek izan duten jarrerarekin/egin duten lanarekin. Aukera honekin, azken urtetan izandako hutsune bati nolabaiteko erantzuna emango zaiola ere azpimarratu dute.

Sortu da Igeldoko Tokiko Entitatea

Nork argitaratua: Igeldo Herria Kategoriak: Azaleko Nabarmendua 5 hilabete, 3 aste atzera

Igeldoko Tokiko Entitate Txikia (TET) abenduaren 19an sortu zen ofizialki. Donostiako Udalak egin beharreko zuzenketak eginda, Foru Aldundiaren esku utzi zuen espedientea berriz urriaren 25ean eta abenduaren 17an eman zioten onarpena.
Behin sortuta, hurrengo pausoak izango dira Foru Aldundiak Kudeaketa Batzordea (gestora) izendatzea, alderdiek Udal hauteskundeetan Igeldon lortutako emaitzen arabera (EH Bilduk 4; EAJk 1), eta gestorak lehenengo auzo batzarra egitea (Plenoa) TET martxan jartzeko. TET Batzordeko kideek jakinarazi dute beraiek prest azaldu direla orain arteko lanari jarraipena eman eta gestora hori osatzeko. Hala adierazi diete alderdiei.
Igeldoko Udalak 1.499.973 euroko aurrekontua izango du 2025 urtean.

Egin beharrekoak
Azken pausoen eta datozenen berri emateko, Herri Batzarra egin zen urriaren 20an.
TET sortzen denean, hurrengo pausoak edo egin beharrekoak honakoak direla adierazi zuten TET Batzordeko kideek:
- Egitura administratibo-juridikoa eraikitzen jarraitu (momentu honetan Donostiako Udaleko teknikari bat dago guztia martxan jartzen Igeldok teknikari propioa izan arte).
- Gure eskumenak gure gain har­tzeko bideak aztertu (brigada, kontratuak...).
- Herri antolaketa mantendu eta hobetu (Batzordeak indartu).
- Langile propioak aukeratu.
- Igeldoko Udalaren egoitza berriaren proiektua landu (Eskola Zaharra).
- Donostiako Udalarekin izango ditugun harremanak zehaztu (Jarraipen Batzordea martxan jarri, hitzarmenak lotu...).
- Eskumen berriak lortzeko negoziaketan jarraitu (hirigintza, etxebizitza, hilerria...).

Presoen aldeko manifestaziora joateko, eguneko plana

Nork argitaratua: Igeldo Herria 5 hilabete, 3 aste atzera

Behin betiko. Bakea. Konponbidea. Elkarbizitza mezuarekin, manifestazioa egingo da Bilbon urtarrilaren 11n Sarek deituta. Azken aldian ohiturak aldatu egin direla eta, «orain kosta egiten da autobusez denak Igeldotik batera joatea eta asko kotxez gerturatzen dira umeak tarteko», plan berri baten proposamena luzatu dute deitzaileek. Egun osoko plan bezala hartu eta igeldoarrak Bilbon elkartzea izango litzateke asmoa. Bertan elkarrekin bazkaldu eta ondoren manifestaziora batera joatea. Plana hobeto zehazten dutenean, informazioa ohiko bideetatik zabalduko dutela jakinarazi dute. Hori bai, modu batera edo bestera Bilboko kaleak betetzera joateko dei egiten dute.

• 8. orrialdea 132-(e)tik
• ←
• 3
• 4
• 5
• 6
• 7
• 8
• 9
• 10
• 11
• 12
• →