Sortu da Igeldoko Tokiko Entitatea

Nork argitaratua: Igeldo Herria 3 aste, 5 egun atzera

Igeldoko Tokiko Entitate Txikia (TET) abenduaren 19an sortu zen ofizialki. Donostiako Udalak egin beharreko zuzenketak eginda, Foru Aldundiaren esku utzi zuen espedientea berriz urriaren 25ean eta abenduaren 17an eman zioten onarpena.
Behin sortuta, hurrengo pausoak izango dira Foru Aldundiak Kudeaketa Batzordea (gestora) izendatzea, alderdiek Udal hauteskundeetan Igeldon lortutako emaitzen arabera (EH Bilduk 4; EAJk 1), eta gestorak lehenengo auzo batzarra egitea (Plenoa) TET martxan jartzeko. TET Batzordeko kideek jakinarazi dute beraiek prest azaldu direla orain arteko lanari jarraipena eman eta gestora hori osatzeko. Hala adierazi diete alderdiei.
Igeldoko Udalak 1.499.973 euroko aurrekontua izango du 2025 urtean.

Egin beharrekoak
Azken pausoen eta datozenen berri emateko, Herri Batzarra egin zen urriaren 20an.
TET sortzen denean, hurrengo pausoak edo egin beharrekoak honakoak direla adierazi zuten TET Batzordeko kideek:
- Egitura administratibo-juridikoa eraikitzen jarraitu (momentu honetan Donostiako Udaleko teknikari bat dago guztia martxan jartzen Igeldok teknikari propioa izan arte).
- Gure eskumenak gure gain hartzeko bideak aztertu (brigada, kontratuak...).
- Herri antolaketa mantendu eta hobetu (Batzordeak indartu).
- Langile propioak aukeratu.
- Igeldoko Udalaren egoitza berriaren proiektua landu (Eskola Zaharra).
- Donostiako Udalarekin izango ditugun harremanak zehaztu (Jarraipen Batzordea martxan jarri, hitzarmenak lotu...).
- Eskumen berriak lortzeko negoziaketan jarraitu (hirigintza, etxebizitza, hilerria...).

Hasierako lau langileak, lan poltsatik
Hasiera batean, Igeldoko Erakundeak lau langile izango ditu: Administrazio Orokorreko Teknikaria (%100), Arkitekto Teknikoa (%100), Administraria (%70) eta Teknikari Soziokulturala (%50). Aurrerago, bi langile polibalente izateko aukera geratzen da eskumen berriak hartzearekin batera.
Hasteko, lau langile horiek Donostiako Udaleko edo bestelako erakunde publikoetako lan poltsatik hartuko dira. Aurrerago, deialdi publikoa egin beharko du Igeldoko Erakundeak lanpostu horietarako.

2025 urteko aurrekontua osatzen
Igeldoko Erakundea sortu eta lehenengo auzo batzarrean, 2025eko aurrekontuak onartu beharko dira. Hori horrela, TET Batzordeko kideak aurrekontua prestatzen ari dira. Herri Batzarrean, proposamenaren berri eman zuten eta begi onez ikusi zuten herritarrek. Azpimarratu zuten datorren urteari begira ez dela aldaketa askorik egiteko aukerarik izango.
Horrez gain, 2024 urtearen barruan sortzeak garrantzi handia zuela gaineratu zuten; «izan ere, 2024 urterako TETari dagokion inbertsioetarako dirua ere jasoko dugu: 291.000 euro».
Horiek esanda, 2025eko aurrekontuaren proposamena azaldu zuten:
- Zerbitzuak kontratuekin lotuta daudenez, momentuz dauden bezala mantendu beharko dira (ahal den neurrian kontratuak eten eta Igeldotik hasi).
- Diru laguntzak orokorrean mantendu egingo dira, baina zertxobait egokituko dira Igeldoko beharretara.
- Inbertsioak: beraien proposamenak azaldu zituzten eta herritarren ekarpenak ere bildu zituzten.

INBERTSIO PROPOSAMENAK

Bideak berritu: Agiti, Buztinzuri, Lapabide, Tximistarri...
Kultur etxea egokitu: igogailua, komuna, pintatu, terraza estali...
Lizardi txukundu: iturria...
Plaza/kaxkoa berritu. Parte hartze prozesu bat egingo da.
Rokodromo txiki bat eskolan
Eskolako kantxa estali
Lokalak lortu, izan ditzakegun beharretarako: brigadarentzat, herriko ostatua...

Pazientzia handia
TET Batzordeko kideak pozik daude azkenean Igeldoko TET sortzera doalako, baina herritarrei gogorarazi nahi die pazientzia handia eta denbora beharko dela guztia martxan jartzeko eta sakoneko aldaketak lortzeko.
Informazio gehiago nahi izanez gero: herrikontseilua@igeldo.eus / 606 311 734.

Iruzkinak

Oraingoz ez dauka iruzkinik

Iruzkin berria

Azken postak

Artxibategia

Cookie-en erabilera oharra

Igeldoko Herri Kontseiluko webgunea

Webguneko gaiaren kolorea

Igeldo Herria