Igeldo Herria

• Blog!
• Kategoria: Azaleko Nabarmendua

Blog!

Hurrengo kategoria duten postak ikusten: Azaleko Nabarmendua

Genero indarkeriaren izeberga ikusgai

Nork argitaratua: Igeldo Herria Kategoriak: Azaleko Nabarmendua 3 urte, 4 hilabete atzera

Azaroaren 25a, Emakumeen Kontrako Indarkeriaren Aurkako eguna dela eta, genero indarkeriaren izeberga osatu eta ikusgai jarri zuten Igeldoko Emakumeek arkupean.  Azaroa hasieran izan zuten elkartzeko hitzordua eta gai librean hizketan aritu ondorenean, Azaroak 25erako herrian zerbait egitea erabaki zuten. Deialdia zabaldu zuten egun horretan elkartu eta emakumeen kontrako indarkerien inguruan hausnartzeko eta ondorenean izeberga osatu zuten elkartu zirenen artean. Izebergaren metafora oso aproposa dela adierazi dute, izebergaren zati txikiena izaten baita bistan eta handiena ur-azpian. Metafora hori aintzat hartuz, emakumeen egoerarekin parekatu eta genero indarkeriaren izeberga osatu zuten.

Hainbat irteera egin dituzte Eskolako umeek

Nork argitaratua: Igeldo Herria Kategoriak: Azaleko Nabarmendua 3 urte, 4 hilabete atzera

Laster iritsiko dira Gabonetako oporrak, baina aurretik, azken hilabeteetan egindako lanen berri eman digute Eskolatik. HHko ikasleak urarekin esperimentuak egiten ibili dira. 1. Zikloa San Telmon izan da "Bidairik luzeena" erakusketan; lehen mundu biraren inguruko erakusketan. 2. Zikloak Itsas Museora bisita egin du euskal pirata eta kortsarioak ezagutzeko.
Horrez gain, LH osoa Arritxulora gaupasa joan da. Bertan jarduera eta jolas desberdinak egin dituzte: mendi martxa, eskalada...
Bestalde, urtero bezala Oroimen Txokoa ere jarri zuten joan direnei mezua uzteko, baita Halloween eta Gau Beltza ospatu eta landu ere.

Arimen gaua, gau beltza, Halloween...

Nork argitaratua: Igeldo Herria Kategoriak: Azaleko Nabarmendua 3 urte, 4 hilabete atzera

Garai batetan Euskal Herrian ospatzen zela edo ez zela, Ameriketatik etorri zaigun ohitura bat dela,… batzuk ados, besteak ez hain konforme…
Garbi geratu zaiguna da, era batera edo bestera, hemen dugula urriaren 31ko gauaren ospakizuna.
Hori dela eta, Igeldoko guraso talde batek, gau hau gure egitea erabaki genuen. Gau beldurgarri bat ospatuz, euskaraz bustia, jolasez alaitua, apaingarri politez apaindua eta janari dastagarriz goxatua. Elkarrekin momentu polita pasa, gauza desberdinak egitea helburu, herrigiroan eta euskaraz.
Ilunabarrean frontoian elkartu ginen, bakoitzak bere trapu, mozorro, etab-ak armariotik atera eta festari hasiera emanez. Lehenik eta behin, eskulanak egin ziren, hauekin frontoia apaindu zelarik ondoren. Gero, jolas ugari egin ziren, musikaz alaituta, ume eta ez hain umeek oso ondo pasa zuten. Jarraitzeko, Igeldoko txoko desberdinetan postu beldurgarriak jarri ziren, ume eta ez hain umeak taldetan osatu eta postuan aurkitzea zen xedea. Behin aurkitzean, erronka bat osatu eta saria jasotzen zuten.
Azkenik, berriro ere frontoian bildu ginen, pizza eta gaztainak janez eman genion amaiera gure Igeldoko urriaren 31ko ospakizunari.
Eta hala bazan eta ez bazan, sar dadila kalabazan eta irten dadila Igeldoko plazan…

Euskararekin gozatuz

Nork argitaratua: Igeldo Herria Kategoriak: Azaleko Nabarmendua 3 urte, 4 hilabete atzera

Euskararen Egunaren harira, hainbat ekintza antolatu ziren Igeldon azaroko azken asteburuan. Hain zuzen, umeentzako zinea, gaztetxoentzako sexologia tailerra, II. Euskaldun Peto lehiaketa eta rap tailerra eskaini ziren. Haur, gazte zein helduek euskararekin goza­tzeko aukera izan zuten.

Igeldoko olatu morea

Nork argitaratua: Igeldo Herria Kategoriak: Azaleko Nabarmendua 3 urte, 5 hilabete atzera

Emakume batzuen ekimenari esker, martxoaren 8aren bezperan, eta egun horrek eman dezakeenari bakarrik ez eusteko, Igeldoko emakumeen izena duen talde bat sortu zen, emakumeek eta emakumeentzat antolatutako topaketetan parte hartu ahal izateko. Proposamena jaso orduko eman nuen izena, abagune ederra izan zitekeelakoan.
Elkartzeko arrazoiak askotarikoak izan daitezke: didaktikoak, ludikoak edo, besterik gabe, elkar ikusi eta hitz-aspertuak egiteko, besteak beste; laburbilduz, gure kezkak, ilusioak eta interesak partekatzeko eta edozein gairi buruz askatasun osoz, aurreiritzirik gabe eta erabateko konfiantzaz, hitz egiteko. Horrela aritu nintzen behintzat lehenbiziko saioan, lasai asko.
Horrela, lehendik ereindakoari jarraituz, aurrerantzean ere elkarlanean aritzeko gogoz eta ilusioz jarduten dute (hemendik aurrera, dugu), bakoitzak eman nahi eta ahal duenarekin. Uste dut asko dugula partekatzeko.
Elkar hobeto ezagutzeko eta harremanak sendotzeko baliatzen ditugun tarte horiek, dudarik gabe, saio emankorrak eta aberasgarriak dira niretzat; konplizitate giroan gustura aritzeko aukera ematen du, eta egindako orduak urriak izan diren sentsazioarekin amaitu dut. Oso adierazgarria da hori, ezta?
Gazteen freskotasunak, helduen esperientziak, guztiok dugu lekua, eta elkarrekin eta guztiontzako era konstruktiboan aritzeko gune ezin hobea dela iruditzen zait.
Nire ustez, Igeldoko olatu morea ez da azaleko apar soila; izan ere, urak duen indarraren antzera, gure indar kolektiboak mugiarazten gaitu, kalean aldarrikatzeko zein modu intimistagoan aritzeko.
Esker txaloa!

• 38. orrialdea 79-(e)tik
• ←
• 33
• 34
• 35
• 36
• 37
• 38
• 39
• 40
• 41
• 42
• →