Igeldo Herria

• Blog!

Blog!

«Zakur kakak jaso egin behar dira»

Nork argitaratua: Karmele Garmendia Kategoriak: Azaleko Nabarmendua 5 urte, 6 hilabete atzera

Azken aldian zakur kakaz josia dago Igeldoko kaxkoa eta herritar askorentzat arazo bat izaten ari dela azaldu zuen Herri Kontseiluak batzarrean. Arazoari konponbidea jarri nahian, kanpaina bat jarriko du martxan, zakur jabeak kontzientziatu eta kakak jaso egin behar dituztela konturatzeko, «denon arteko elkarbizitza hobea izan dadin». Eta egiten den lekuan egiten direla, zakur kakak beti jaso behar direla azpimarratu zuten batzarrean.
Alde batetik, kartelak jarriko dira kaxkoan zehar, puntu ezberdinetan, eta bestetik, neurri desberdinak aztertzen ari dira.

Bi idatzitan, kezka adierazi dio Herri Kontseiluak Udalari

Nork argitaratua: Karmele Garmendia Kategoriak: Azaleko Nabarmendua 5 urte, 6 hilabete atzera

Herri Kontseiluak bi idatzi aurkeztu ditu iraila eta urrian, Udal erregistroan. Eta bietan kezka adierazi du. Alde batetik, Zerutxoko kurba inguruko obrari lotutakoa izan da idatzia (maiatzeko euriteek eragindako kalteak konpontzeko obra). Bertan, obrak lehenbailehen hasi eta bukatzeko eskatu dio berriz Udalari. Zenbaitetan, semaforoarekin ilara luzeak egin eta arrisku egoerak sortzen direla azpimarratu die. Udal teknikariak azaldu duenez, udazkenean zehar egitea aurreikusten dute, baina data zehatzik ezin dute esan oraingoz. Behin hasita, pare bat astetako lana izango dela aurreratu dute. Eta lan hauekin batera, Lasarmendi bideko zati bat ere konponduko litzateke. Beste zatia, aurrerago egingo dute.
Bestetik, Pilotegi bideko obrari lotutako idatzia erregistratu da (obra honetan Pilote­giko goiko zatia asfaltatu eta babesgarria eta zabalguneak jarriko dira). Lanak 2019 urtean egingo zituztela azaldu zuten bere garaian, baina oraindik ez dutela ezer egin ikusita, Herri Kontseiluak kezka adierazi du. Izan ere, obra aurten egiten ez bada, Diputazioaren diru lagun­tza galduko luke Udalak eta ondorioz, lanak ez egiteko arriskua ikusten du Herri Kontseilu­ak. Udal teknikariak azaldu duenez, kontratuen lege berria dela eta, atzeratuta dabiltza, baina proiektua aurten egiteko ahalegin guztiak egiten ari dira.

Talde berria aurkeztu eta azken egunetako gaien berri eman zuten batzarrean

Nork argitaratua: Karmele Garmendia Kategoriak: Azaleko Nabarmendua 5 urte, 6 hilabete atzera

Honako bederatzi herritarrek osa­tzen dute egungo Herri Kontseilua: Ainhoa Uranga, Asier Sota, Iraitz Santa Kruz, Jexux Albeniz, Iñaki Imaz, Eneko Dorronsoro, Jaione Dorronsoro, Aratz Urruzmendi eta Pello Galarragak. Irailaz geroztik, martxan da Herri Kontseilu berria eta urriaren 13an Herri Batzarra egin zuen talde berria herritarren aurrean aurkeztu eta eskuartean dituen azkeneko gaien berri emateko.
Talde berriak gogoan izan zituen aurreko Herri Kontseiluko kideak eta eskerrak eman zizkien lau urtetan egindako lanagatik. Hain zuzen, honakoek osatu dute orain arteko Herri Kontseilua: Ainhoa Gorostidi (lehendakaria), Iker Zinkunegi (idazkaria), Aitziber Alzua (diruzaina), Maider Illarramendi, Aitziber Gabilondo, Miren Zinkunegi, Ander Zubeldia, Ioritz Galparsoro eta Iñaki Aizpurua.

Badator Neguko bigarren Pala Txapelketa

Nork argitaratua: Karmele Garmendia Kategoriak: Azaleko Nabarmendua 5 urte, 6 hilabete atzera

Iaz bere funtzioa ondo bete zuela ikusita, Herri Kontseiluak eta Pelota Elkarteak elkarlanean, bigarren Neguko Pala Txapelketa antolatzea erabaki dute. Helburua, pelotan jolasteaz gain, neguko ostiraletan herrian giro pixka bat sortzea da; herriari bizia ematea. Hori horrela, ostiraletan izango dira partiduak azaroaren 22an hasi eta apirilaren 3ra arte. Arratsaldez jokatuko dira partiduak 18:30etatik aurrera.
Emakumezkoak teniseko pelotarekin ariko dira eta pelota mazizarekin bi maila izango dira.

Egun ederra benetan!

Nork argitaratua: Karmele Garmendia Kategoriak: Azaleko Nabarmendua 5 urte, 6 hilabete atzera

Eguraldi ona, azoka dotorea, jendea goizetik saltsan, bazkari bikaina...egun ederra gaurkoa! Igandean, Udazken Festan, bati baino gehiagori entzundako kontua izan zen eta ez zuten arrazoirik falta. 

• 85. orrialdea 129-(e)tik
• ←
• 80
• 81
• 82
• 83
• 84
• 85
• 86
• 87
• 88
• 89
• →