Igeldo Herria

• Blog!
• Egilea: Karmele Garmendia

Blog!

Hurrengo egilearen postak ikusten: Karmele Garmendia

Lehentasunak jarri eta ekintzak proposatu dira

Nork argitaratua: Karmele Garmendia Kategoriak: Azaleko Nabarmendua 6 urte, 9 hilabete atzera

Joan den ekainaren 14an, batzarra burutu zen partehartze prozesuari lotuta. Bertan, bizilagunek betetako galdeketetatik ateratako ondorioetatik abiatuta, Herri Kontseiluak lanerako izango dituen lehentasunak markatu ziren.
Batzarrera 15 bat lagun gerturatu ziren. Bi ariketa praktiko burutu zituzten talde txikitan banatuta. Lehenengo ariketa Herri Kontseilutik proposatutako lehentasunak kontrastatzea eta zehaztea izan zen. Bigarren ariketa berriz, lehentasun horiek aurrera eramateko egin daitezkeen ekin­tzak proposatzea.
Batzarrera gerturatutako bizilagunek ekintza ugari eta interesgarri proposatu zituzten:
Elkarbizitza arloan: gazte zein 3. adinekoentzat toki bat, kultur eskaintza handiagoa, kultur etxearen autogestioa…
Azpiegituren arloan: espaloiaren beharra, bideen mantenua, zaborraren bilketa hobea, ura eta saneamendua, garraioa landa guneetara zabaltzea eta autobusaren ordutegia eta ibilbidea hobetzea…
Garapen ekonomikoaren arloan: beharrei egokitutako garapena, etxebizitza beharraren inguruko lanketa eta etxe hutsen inbentarioa egin; gai hau aurrera eraman eta lantzeko talde bat sortuz…

Garagardo Azoka arrakastatsua

Nork argitaratua: Karmele Garmendia Kategoriak: Azaleko Nabarmendua 6 urte, 9 hilabete atzera

Pasa den asteburuan, Garagardo Azoka egin da Igeldon. Ez ohiko Garagardo Azoka izan da, bertako garagardo eta jakiek izan baitute protagonismoa. Hori horrela, ostiraletik igandera honako garagardoak edateko aukera egon da: Basque­land (Hernani), Bidassoa (Irun), Gorakraft (Donostia), Malagissona (Oiartzun-Donos­tia) eta Zarautz (Zarautz). Eta jakiei dagokienean, berriz, honakoak jateko aukera: hegaluzea, mendrexka, gindillak, tomatea, saltxitxak, hirugiharra, arroz esnea...

Bertako garagardo eta jakiak aukeran, ostiraletik igandera

Nork argitaratua: Karmele Garmendia 6 urte, 9 hilabete atzera

Ohikoa ez den Garagardo Azoka antolatu dute Itsas Aurrek eta Kooperatibak asteburu honetarako (uztailak 20, 21 eta 22). Azken honen filosofiarekin bat eginez, bertan egindako garagardo artisauak eta jakiak egongo dira aukeran azoka berezi honetan. Ordutegi desberdinetan egongo da zabalik azoka: ostiralean, arratsalde-gau partean (18:00-23:30); larunbatean egun osoan (12:00-23:30); eta igandean eguerdi-arratsalde partean (12:00-18:30).

Ikastaroetan aurrematrikula egiteko epea zabalik dago

Nork argitaratua: Karmele Garmendia Kategoriak: Azaleko Nabarmendua 6 urte, 9 hilabete atzera

Ieltxoko ikastaroetako ikasle eta irakasleek ekainaren 22an agurtu zuten ikasturtea. Horretarako jaialdi ederra eskaini zuten. Eta dagoeneko, jarriak dira datorren ikasturteari begira. Hain zuzen, aurrematrikula egiteko epea zabalik dago. Datozen egunetan etxe guztietara banatuko dute aurrematrikula egiteko orria. Bestalde, ikastaro berriren bat proposatu nahi izanez gero ere, orain da garaia. Orria kultur etxeko buzoian edota bulegoan utzi daiteke. Emailez ere jarri daiteke harremanetan: ieltxokulturelkartea@ymail.com

Izen eta irudi bila dabil Kooperatiba

Nork argitaratua: Karmele Garmendia Kategoriak: Azaleko Nabarmendua 6 urte, 9 hilabete atzera

Kooperatibako proiektua aurrera doa eta orain, izen eta irudi baten bila dabiltzala jakinarazi dute: «Proiekzio gehiago izan dezakeen izena jarri eta gure proiektuarekin bat egiten duen irudi bat bilatzea oso garrantzitsutzat jotzen dugu». Bazkideen artean zabaldu dute deia eta animatzen direnek posta elektronikoz aurkeztu ditzakete ideiak: igeldokoop@gmail.com.

Ordainketak eginda
Bazkide izateko konpromisoa hartu zutenek egin dituzte ordainketak eta oso albiste ona dela azaldu du Kooperatibak: «proiektuaren garapenerako indarra eta seriotasuna adierazten ditu; pauso ziurrak eta irmoak emanez, aurrera goaz!».

Eraikineko lanak ere aurrera
Obra kontuetan ere aurrerapausoak ematen ari dira Kooperatibako kideak. Eraikinean zorua bota dute eta hainbat auzolan egun egin dituzte. Egun horietan, barrua txukundu eta posteak eta bigak lijatu dituzte, besteak beste.

• 32. orrialdea 53-(e)tik
• ←
• 27
• 28
• 29
• 30
• 31
• 32
• 33
• 34
• 35
• 36
• →