Pausoz pauso, martxa hartzen

Nork argitaratua: Igeldo Herria 3 egun, 4 ordu atzera

Igeldoko Toki Entitate Txikia abenduaren 20an sortu bazen ere, ofizialki martxan jartzeko, lehenengo batzarra egin beharra zegoen eta Foru Aldundiak jarri behar zuen eguna. Azkenean, martxoaren 6an izan zen eta bertan Batzorde Kudeatzaileko ordezkariak izendatu eta presidentea aukeratu zituzten (Udal hauteskundeak egin bitarte). Honakoak dira Batzorde Kudeatzailea osatzen duten kideak: Iker Zinkunegi (presidentea), Eneko Dorronsoro, Pello Galarraga, Karmele Garmendia eta Iñigo Barandiaran.
Azken Udal Hauteskundeetan alderdi politikoek Igeldon lortutako emaitzen arabera izendatu behar zituzten ordezkariak. EH Bilduk 4 izendatu behar zituen eta EAJ/PNVk 1. Herri Kontseiluko kideek alderdiei eskatu zieten orain artean prozesuan lanean aritutako herriko ordezkariak izendatzeko, prozesuari jaraipena eman eta lanean jarraitzeko prest zeudelako. EH Bilduk proposamena onartu eta herriko lau ordezkari izendatu zituen. Barandiaran, berriz, EAJ/PNVk izendatua izan da.

2025 urteko aurrekontuak
Batzorde Kudeatzaileko kideak ari dira pixkanaka eman beharreko pausoak ematen eta Igeldoko Entitatea martxan jartzen.
Apirilaren 8an Entitatearen lehenengo auzo batzarra egin zuten (Plenoa). Bertan, besteak beste, 2025 urteko aurrekontuei behin behineko onarpena eman zieten. 15 egun baliagarriko epean erakusketan egon da nahi duenak aztertu eta erreklamazioak egiteko. Epe hori pasata, eta erreklamaziorik egin ez denez, onartuta geratu dira aurrekontuak.
Maiatzaren 8an bigarren auzo batzarra egin zuen Igeldoko Entitateak eta bertan Aurrekontuak, lanpostuen sorrera eta identifikazio irudia izan zituzten hizketagai, besteak beste.

Plenoak hilean behin
Auzo batzar edo plenoen maiztasunak ere zehaztu dituzte eta momentuz, hilabetero izango dira. Hileko lehenengo ostegunetan izango dira 20:00etan Itsas Aurren. Plenoak irekiak dira eta edozein herritar gerturatu daiteke.
Horrez gain, Plenoetan hartzen diren erabakiak edo lantzen den edukia publikoa da eta norbaitek eskuratu nahiko balu, eskatu besterik ez du.

Egoitza elektronikoa martxan
Apirilaren erdiaz geroztik, Igeldoko Entitatearen egoitza elektronikoa ere martxan dago. Herritarrek tramiteak egin ditzakete online. Hala ere, erabat osatzea falta da oraindik.

Bitariko batzordea lanean
Igeldoko Entitatea sortu bada ere, oraindik badira hainbat kontu Donostiako Udalarekin landu eta koordinatu behar direnak. Dagoeneko Igeldoko Entitatearen eskumenak direnak daude alde batetik, eta bestetik, bigarren fase batean transferitzeko geratu direnak, besteak beste. Lanketa guzti hori egiteko, bitariko batzordea osatu dute Igeldoko Entitateak eta Donostiako Udalak. Bi aldeetako ordezkari eta teknikariak daude bertan.

Iruzkinak

Oraingoz ez dauka iruzkinik

Iruzkin berria

Azken postak

Artxibategia

Cookie-en erabilera oharra

Igeldoko Herri Kontseiluko webgunea

Webguneko gaiaren kolorea

Igeldo Herria