Blog! | Igeldo Herriko webgunea Skip to content

Blog!

Hurrengo kategoria duten postak ikusten: Azaleko Nabarmendua

Hainbat ekintza antolatu dira Euskararen Egunaren bueltan

Euskararen Eguna abenduaren 3a da, baina aurrea hartuta ospatuko da eguna aurten Igeldon. Hain zuzen, azaroaren 26, 27 eta 28ko asteburuan izango dira ekintzak. Azken urteetan bezala, umeentzako zine emanaldiak izango dira ostiralean. Larunbat arratsaldean, berriz, sexologia saioa izango da 12 urtetik gorako gazteentzat eta ondoren, Euskaldun Peto Lehiaketaren bigarren edizioa jokatuko da. Herriko lau talde ariko dira nor baino nor gehiago titulua eskuratzeko lehian. Igande eguerdian, urterokoa bihurtu den zunba saio irekia izango da eta arratsaldean, rap tailerra izango dute 10 urtetik gorako umeek La Basu rap abeslariaren eskutik.

Igeldoko olatu morea

Emakume batzuen ekimenari esker, martxoaren 8aren bezperan, eta egun horrek eman dezakeenari bakarrik ez eusteko, Igeldoko emakumeen izena duen talde bat sortu zen, emakumeek eta emakumeentzat antolatutako topaketetan parte hartu ahal izateko. Proposamena jaso orduko eman nuen izena, abagune ederra izan zitekeelakoan.
Elkartzeko arrazoiak askotarikoak izan daitezke: didaktikoak, ludikoak edo, besterik gabe, elkar ikusi eta hitz-aspertuak egiteko, besteak beste; laburbilduz, gure kezkak, ilusioak eta interesak partekatzeko eta edozein gairi buruz askatasun osoz, aurreiritzirik gabe eta erabateko konfiantzaz, hitz egiteko. Horrela aritu nintzen behintzat lehenbiziko saioan, lasai asko.
Horrela, lehendik ereindakoari jarraituz, aurrerantzean ere elkarlanean aritzeko gogoz eta ilusioz jarduten dute (hemendik aurrera, dugu), bakoitzak eman nahi eta ahal duenarekin. Uste dut asko dugula partekatzeko.
Elkar hobeto ezagutzeko eta harremanak sendotzeko baliatzen ditugun tarte horiek, dudarik gabe, saio emankorrak eta aberasgarriak dira niretzat; konplizitate giroan gustura aritzeko aukera ematen du, eta egindako orduak urriak izan diren sentsazioarekin amaitu dut. Oso adierazgarria da hori, ezta?
Gazteen freskotasunak, helduen esperientziak, guztiok dugu lekua, eta elkarrekin eta guztiontzako era konstruktiboan aritzeko gune ezin hobea dela iruditzen zait.
Nire ustez, Igeldoko olatu morea ez da azaleko apar soila; izan ere, urak duen indarraren antzera, gure indar kolektiboak mugiarazten gaitu, kalean aldarrikatzeko zein modu intimistagoan aritzeko.
Esker txaloa!

ATZERA BEGIRA: Zaharren Eguna

Argazki zaharren atalean, oraingo alean, herrian aspalditik ospatu ohi den “Zaharren Eguna” hartu dugu gaitzat. Gaur egun, Udazken Jaiaren barruan antolatzen da herriko jubilatuei egiten zaien omenaldia, baina garai batean “Zaharren Eguna” izenarekin antolatzen zen jaia. 1977 urtean ospatu zen lehendabiziko aldiz eta Auzolan elkartea izan zen antolatzailea. Ordutik urtero antolatu izan zen, 2005 urtean Udazken Jaiaren barruan antola­tzen hasi zen arte. Egitarauari dagokionean gaurkoaren antzekoa izan ohi zen hasirako urteetan ere: meza, hamaiketakoa, herri kirolak edo pelota partidua eta bazkaria. Bazkaria “catering” bidez antolatzen zen eta herriko leku ezberdinetan egin izan zen: Buena Vista jatetxean eta  Buena Vista azpiko lokalean, Harrobian, Calongeren sagardotegian, Guda­mendiko Txoko Berri jatetxean... 1993 urtean berriz herriko plazan egin zen bazkaria, karpa handi bat jarrita. Hasieratik izan zen herriko aiton-amona zaharrenak omen­tzeko ohitura eta hortaz aparte 65 urtetik gorako herritar guztiei oroigarri bat eman ohi zitzaien. 

Junta aldaketa eta beste hainbat kontu izan ziren Din-Dinen batzarrean

Irailaren 26an egin zuten urteko batzarra Din-Din elkartekoek eta 3 juntakide berri aukeratu zituzten. Itziar Uranga, Igor Agirre eta Jexux Albeniz dira 2 urterako konpromisoa hartu dutenak eta lehendik zeuden Begoña Gandarias, Ainhoa Aramendi eta Jesus Galindorekin batera ariko dira lanean. 2 urteko ibilbidea eginda juntatik atera direnak berriz: Mikel Arruti, Juanjo Barrondo eta Iñaki Ugarte izan dira. Lehendakaria Jexux Albeniz izango da eta idazkari lanean Ainhoa Aramendik jarraituko du.
Batzarrean ez zen jende askorik izan, guztira 15 pertsona inguru elkartu ziren eta honako gaien inguruan aritu ziren hizketan: Erretzeari dagokionez, Covid-19a dela eta elkarte osoan debekatua dago erretzea (pandemia hasi zenetik erabaki zen) eta beste urte batez berdin jarraitzea erabaki zuten batzarrean. Faltei dagokienez, kamarak jarri arren falta ugari izaten jarraitzen omen da eta gai hau serioago hartuko dela erabaki zuten, kamaren bidez garbaturikoa kontrolatzen hasiko dira. Bazkide batek, elkarteak ekintza gehiago antolatu beharko lituzkeela proposatu zuen eta ideia kontuan hartuko dutela adierazi dute juntakideek, osasun egoerak aukera ematen duen neurrian.
Diru kontuei dagokienean, balorazio positiboa egin zuten eta Udazken Jaiean, aurtengoan, bazkaria Catering bidez izango denez, elkarteak diru aportazio bat egingo duela erabaki zuten gastuak ordaintzen laguntzeko. Horrez gain, azaldu zuten Kooperatibari utzitako diru kopuruaren zati bat bueltan jaso dela.

Sari ugari lortu dituzte Longa baserrikoek

Irailaren 3tik 8ra Salamancan izan zen Joxe Angel Zendoia bere familiarekin. Bertan “Blonde de Aquitania” arrazako ganaduaren XIII. Espainiako Txapelketan parte hartu zuten eta sari ugari lortuta, gustora itzuli ziren etxera.
Salamanca kanpo aldean dagoen ferialekuan izaten da azoka eta blonda arrazako ganadu txapelketaz gain, Charolesen eta Limusinen Espainiako Txapelketa ere izaten da. Ganadu lehiaketez aparte, makinaria, janaria eta bestelako animalien (zaldiak, ardiak, txerriak, oiloak...) azoka ere izaten da. Longakoek, 11 bururekin parte hartu zuten eta guztira 98 buru izan ziren lehiaketan parte hartu zutenak, 15 sailetan banatuta.
Lau 1. sari eskuratu zituzten: Panpoxa (18-36 hilabeteko bigarak), Lastur (5 urtetik gorako behiak bere txahalarekin, A atalean), Greta (5 urtetik gorako behiak bere txahalarekin, C atalean) eta Rocky (12-24 hilabeteko idiskoak).
Bi 2. sari eskuratu zituzten: Odry (3-5 urteko behiak txahalik gabe) eta Jai (5 urtetik gorako behiak bere txahalarekin, B atalean).
Bi 3. sari eskuratu zituzten: Igeldo (5 urtetik gorako behia bere txahalarekin, C atalean) eta Rai (12-24 hilabeteko idiskoa).
Rocky idiskoarekin, “Txa­pel­dun Handiaren Erreserba” saria ere lortu zuten eta lehiaketako azken egunean izan zen subastan 2 idiskoak saldu zituzten.

Azken postak

Artxibategia

2021
2020
2019
2018
2017

Kategoriak

Etiketak

Egileak

Web-jarioak

RSS / Atom