Igeldo Herria

• Blog!
• uztaila, 2022

Blog!

Hurrengo epealdiko postak ikusten: uztaila, 2022

Umeentzako zinea, plazan

Nork argitaratua: Igeldo Herria urte 1, 4 hilabete atzera

Iaz egin bezala, zine saioa izango da plazan Kultur Mahaiak atolatuta. Oraingoan, saio bakarra antolatu dute eta umeentzako izango da. Ostiralean izango da, hain zuzen (uztailak 29). Gaueko 22:00etan jarri dute hitzordua. Oraingoan ere sorpresa goxoak izango dira!
Pelikula erabaki dute dagoeneko. Tintinen abenturetan murgiltzeko aukera izango da. Eta oraingo honetan, Ilargia izango du helburu.

Txalingo obrarekin kezkatuta

Nork argitaratua: Igeldo Herria Kategoriak: Azaleko Nabarmendua urte 1, 4 hilabete atzera

Herri Kontseiluak jakinarazi du kezkatuta jarraitzen duela Txalingo obrarekin. Hasieratik irregulartasun zantzuak ikusi ditu bertan eta gertatutakoaren inguruan informatzen aritu da. Azaldu duenez, azken eskaera bat aurkeztu berri du Udal Erregistroan. Erreportaje grafiko bat eskatu du, Udaltzainak edo dagokiona bertaratuz. Arrazoiaren berri eman du: «Txalinen eraiki­tzen ari direna, itxura eta materialagatik, txalet moderno bat da. Kasu horretan, ez luke beteko indarrean dagoen Plan Orokorraren arau orokorrek eta eraikuntzako ordenantza osagarrien 35. artikuluak adierazten duten baldintza, hau da, landa-lurzoruan eraikitzen den edozein eraikin berrik gure eremuko landa-eraikuntza tradizionalaren tipologia izan behar duela exijitzea».

Jubilatuak kanturako gogoz

Nork argitaratua: Igeldo Herria Kategoriak: Azaleko Nabarmendua urte 1, 4 hilabete atzera

Jubilatuek bertso bat abestuz eman zieten jaiei hasiera eta Santa Ixabel egunean ere, herri bazkariaren aurretik, Kantu Jira egin zuten herriko tabernetan zehar. Gernikara egin zuten ibilaldirako euskal kanta batzuk prestatu zituzten bazkalostean kantatzeko. Han sorturiko giro ederraren ondorioz, tarteka herrian Kantu Jirak antolatzea erabaki zuten eta jaietan izan zen lehendabiziko saioa. Aurrerantzean ere jarraitzeko asmoa dutela adierazi dute eta hilabetero egun bat jartzeko asmotan dira herriko taberna ezberdinetan zehar euskal kantak abesten ibiltzeko.
Bestalde, udan zehar herrian egiten dituzten ibilaldiekin jarrai­tzeko asmoa ere badute. Apirilean hasi ziren herriko bazterrak ezagu­tzeko eta beraien arteko harremanak indartzeko asmotan herrian zehar oinezko ibilaldiak egiten. Hilabeteko lehendabiziko asteazkenetan elkartzen dira, herriko plazan. Orain artean, 12 laguneko koadrila elkartzen dira eta ibilaldiaren ostean hamaiketako bat ere egiten dute indarrak berritzeko.

Ordutegi aldaketa, IKO dendan

Nork argitaratua: Igeldo Herria urte 1, 4 hilabete atzera

Udan ordutegi aldaketa egingo dute Kooperatiban. Iazko salmentak kontuan harturik eta langileen oporrak tarteko, eguerditan Iko denda itxita egongo da.
Bestalde, ekainaren 19an egin zuten urteko batzarra Kooperatibako bazkideek eta 40 bat lagun elkartu ziren. Urteko balantze ekonomikoaren berri eman zitzaien bertaratu ziren bazkideei eta urteko emaitza positiboa izan dela adierazi zieten. Kooperatiba martxa onean doala esan daiteke, hala ere, bazkideen erosketaz gain, bazkide ez direnen erosketak ere oso garrantzitsuak direla azpimarratu zuten. Beraz, Iko dendan erosketa egiten duten erosle guztiei eskerrak eman nahi dizkiete Kooperatibako juntako kideek, proiektuan sinesteagatik.
Hurrengo urteari begira, produktu eskaintza indartzeko asmoa eta bazkide-laguntzailearen figura martxan jartzeko asmoa dutela adierazi dute. Igeldon bizi ez den pertsona ugari baitago interesaturik proiektuari laguntza emateko eta horretarako egokia ikusten dute bazkide-lagun­tzailearen figura martxan jartzea.

Bigarren, Ondazarte baserriko behia

Nork argitaratua: Igeldo Herria Kategoriak: Azaleko Nabarmendua urte 1, 4 hilabete atzera

Uztailaren 1ean urtero moduan Irunen ospatzen den Frisoi arrazako behien konkurtsoan izan ziren Ondazarte baserrikoak. Aurtengoan lehiaketa honen 21. edizioa ospatu zen eta zenbait sari lortuta itzuli ziren etxera. Behien kategoriari dagokionean, lehen umezkoen atalean Otaitz izeneko behiarekin lehen postua lortu zuten Ondazartekoek eta behi guztien arteko finalean, txapeldunordea izan zen Otaitz. Bigantxekin ere hainbat sari lortu zituzten. Azken hiru lehiaketetan lehendabiziko postua lortu izan dute behien atalean, 2017an Afrodita behiarekin, 2018an Tximistarri behiarekin eta 2019an Afrodita behiarekin berriz ere. Aurtengoan ez dute lehendabiziko postua manten­tzerik lortu, baina gustura daudela adierazi dute. Zorionak beraz Ondazarteko familiari!

• 1. orrialdea 2-(e)tik
• ←
• 1
• 2
• →