Jubilatuak gustora daude ekintzen dinamikotasunarekin

Nork argitaratua: Igeldo Herria 3 aste, 5 egun atzera

Jubilatu Elkartetik adierazi dutenez, urteko egutegia egiteko garaian, kontutan gehien hartzen duten alderdia aktibitateen barietatea da «gure bazkide eta jubilatuen beharrei hobeto erantzutea baita gure helburua». Jubilatuen parte hartzea zabalagoa izateko, aktibitate berriak eta desberdinak aurkitzen saiatzen direla gaineratu dute. Hori horrela, ikasturte berriaren errepasoa eginda, gustora daude ekintzen dinamikotasunarekin.
Alde batetik, hasieratik martxan dauden ikastaroak dauzkate: Pilates, mantentze gimnasia eta memoria lantzeko ikastaroa. Ikastaro hauek nahiko finkatuta dauzkate.
Bestetik, aurten hasitako ikastaro berriak dauzkate: Musikoterapia ikastaroa (aurreko ikasturte bukaeran probatu zen eta irailarekin jarraipena eman zaio) eta Autozaintza eta automasaje ikastaroa. Proba bezala, hiruhileko honetan eskaini da. Ikastaro honetan, masajea ikasteaz gain, nork bere buruaren autozainketa nola egin behar duen irakasten dute. Hamabost pertsonek parte hartzen dute eta datorren urteari begira, aurrera jarraitu edo ez aztertu behar dute.

Hainbat ekintza kultural, udazkenean
Udazkenean zehar, ekintza kulturalak ere egin dituzte Jubilatuek. Esaterako, Euskararen Eguna ospatzeko antolatu zen egitarauan parte hartu zuten Kantujirarekin, euskal abesti ederrenak herrian kantatuz.
Psikologiarekin lotuta eta adimen osasunaren barruan, 4 hitzaldi antolatu dituzte urtean zehar; azkenekoa azaroan, Adimen Artifizialari buruz.
San Telmo Museora bisita gidatua ere antolatu zuten azaroan. Azaldu dutenez, Gipuzkoa eta Euskal Herriko historiaren berri emateko hainbat objektu jasota daude museo honetan: argizaiolak, hilarriak, emakumeak erabiltzen zituzten burukoak, karlisten gerratetako armadurak eta, baita ere, Igeldoko Txalin dema-harria ere.
Udazkeneko aktibitateen barruan, Amaiurreko gazteluaren aztarnak eta historia ezagutzeko aukera izan dute. Baztan/Elizondo bisita gidatua ere egin zuten eta ondoren, Donezteben bazkaldu zuten.

Ibilaldiak eta bazkaria
Hilero ibilaldiak eginez jarraitzen dute, Igeldoko eta inguruko auzoetako bideak ezagutu eta paraje eder hauetaz gozatzeko. Aktibitate honetan hamar bat pertsonek hartzen dute parte.
Azkenik, urteari bukaera ona emateko, bazkari bat antolatu dute herriko jubilatuentzat. Abenduaren 14an izango da Calonge sagardotegian.

Iruzkinak

Oraingoz ez dauka iruzkinik

Iruzkin berria

Azken postak

Artxibategia

Cookie-en erabilera oharra

Igeldoko Herri Kontseiluko webgunea

Webguneko gaiaren kolorea

Igeldo Herria