ARANTXA TXINTXURRETA - BIOLOGOA: «Iraungo badu, baldintza egokiak ere behar ditu, baina hori gizakion ardura da»

Nork argitaratua: Karmele Garmendia 5 urte, 8 hilabete atzera

Arantxa Txintxurreta igeldoarrak bigarren saria lortu du Europako bisoiaren inguruko Mikroipuinen Lehiaketan, “Gainerakoan, erruki” ipuinarekin. Irabazitako saria: 200 euro liburutan, Gasteizko liburu-denda batean gastatzekoak. Dena dela, oraindik ez omen du ezer erosi, buru belarri baitabil master batekin. Gure galderak erantzuteko tartetxo bat atera du behintzat.

Otsailean izan zen lehiaketa Gasteizen eta bigarren saria lortu zenuen 23 partaidetatik. Gustora?
Bai, oso.

Aurretik ere parte hartu izan al duzu halako lehiaketetan edo nolatan animatu zinen?
Gasteizera joatekoak ginen eta zer egin antolatzen nenbilen, lehiaketaren berri izan nuenean. Salburuako interpretazio-gunea da Ataria eta berak antolatu zuen lehiaketa. Salburua hezegune ederra da, eta bisitak merezi du. Azkenean ez ginen Gasteizera joan, eta, Salburuara ere ez, ondorioz, baina lehiaketara hiru lerroak bidali nituen. Horrelakorik ez dut inoiz idatzi, baina bai laburragoak (140 karaktereko txioa) eta luzexeagoak ere, gure seme-alabentzat.

Eta aurretik irabazi al duzu inoiz halako saririk?
Ez dut inoiz saririk jaso, ipuin laburren lehiaketan, baina Orion bizi ginenean, bitan parte hartu nuen hango ipuin lehiaketan eta bietan jaso nuen saria. Bi folio luzeko ipuinak ziren.

Zer da ipuin honetan adierazi nahi izan duzuna?
Gaia finkoa zen, Europako bisoia, eta hari buruzko zerbait kontatu behar genuen, eta, ahal bazen, kontserbazioaren aldetik, uste dut. Egia esan, ez dut ongi gogoratzen, lehengo urteko gauza da eta. Kontua da, Europako bisoia galtzeko arriskuan dagoela eta mehatxuak ditu Ameriketako bisoia eta errepideak, besteak beste. Eta bizirik iraungo badu, ipuinean azaltzen dena egin beste aukerarik ez du; horretarako, noski, baldintza egokiak behar ditu, baina hori gizakion ardura da. Azken hori izenburuaren atzean dago…

Ipuinak gehienez 50 hitz izan behar zituen. Asko kosta al zitzaizun hain hitz gutxirekin nahi zenuena kontatzea?
Inspiratuta egongo nintzen nonbait, denbora gehiegirik gabe idatzi nuen eta.

Beste zerbait gehitu nahiko zenuke?
Garai batean literatur lehiaketa bazegoen Igeldon, eta ongi legoke hori berreskuratzea, igeldoarrak idaztera animatzeko.

'GAINERAKOAN, ERRUKI'
- Hona, biloba, bisoi zahar honek emango dizkizun azken aholkuak: amerikarretatik urrundu; errepide-mingain gris eta zaratatsuetatik ere bai; ez hurbildu bi oinetako makil luzeei; baina, bereziki, izan zoriontsu, gozatu igerian, ehizan... egiten duzun guztian; eta bilatu bikotea, eta izan kume ugari. Horixe baita etorkizuna bermatzeko gure esku dagoen gauza bakarra.

Iruzkinak

Oraingoz ez dauka iruzkinik

Iruzkin berria

Azken postak

Artxibategia

Cookie-en erabilera oharra

Igeldoko Herri Kontseiluko webgunea

Webguneko gaiaren kolorea

Igeldo Herria